intertv.az
intertv.az

İbadət edən siyasətçilərimiz

3-06-2019, 19:49 37 dəfə baxılıb

İbadət edən siyasətçilərimiz


Partiya sədrləri, deputatlar arasında namaz qılanlar da var

Ramazan ayının son gününü yaşayırıq. İslam dininin şərtlərinə əsasən, bu ayda ölkəmizdə müsəlmanlar oruc tutub, namaz qıldılar. Onların arasında sadə vətəndaşlar da, tanınmış şəxslər və məmurlar da var. Maraqlıdır, bəs dinimizin bütün şərtlərinə əməl edib, namaz qılan siyasətçilərimiz hansılardır?

İbadət edənlərdən biri BQP başqanı, deputat Fazil Mustafadır. Deputat müsahibələrinin birində qeyd edib ki, 28-30 yaşına qədər din haqqında ciddi məlumatı olmayıb. Lakin təxminən 1993-cü ildən başlayaraq onda dinə maraq oyanıb. Deputatın dediyinə görə, məhz həmin illərdə Azərbaycanda ənənəvi İslamı, xüsusilə İran modelli İslamı öyrənməyə cəhd edib: “Sonradan düşündüm ki, bunlar mənim üçün yetərli deyil. Buna görə də teoloji nəşrlərdən yox, fəlsəfi nəşrlərdən dinin öyrənilməsinə üstünlük verdim. İslam sferasını tədqiq edən filosofların əsərlərini ciddi şəkildə araşdırmağa başladım və bu istiqamətdə çox sayda İslam mütəfəkkirlərinin əsərlərini oxuyub müqayisəli təhlillər apardım”.

İbadət edən siyasətçilərimiz


Milli Məclisin digər deputatı, QMİ sədri Allahşükür Paşazadənin qardaşı Cavanşir Paşazadə də ibadətlə məşğul olur, amma hərdən. Bu barədə deputatın özü müsahibələrinin birində qeyd edib: “Mən mömin ailəsində dünyaya gəlmişəm. Ancaq mən ibadət işlərini tam yerinə yetirmirəm. Yəni hərdən namaz qılıram, hərdən qılmıram. Yalan danışa bilmərəm, sistemli namaz qılmıram”.

İbadət edən siyasətçilərimiz


Eyni dairədən 5 dəfə seçilən deputat Madər Musayev də dini ibadətə riayət edir, hər il oruc tutub, namaz qılır. Deputatın özünün dediyinə görə, onu deputat Madərdən çox, hacı Madər kimi tanıyırlar. Səbəbini isə deputat bu cür açıqlayıb: “1990-cı ildə Azərbaycandan Həcc ziyarətinə gedən ilk qrupun tərkibində mən də olmuşam. O vaxt Həcc ziyarətinə 164 nəfər getmişdi. Biz elə bir vaxtda Həccə getmişdik ki, onda adamlar həbsxanada yatanı qəbul edirdilər, dindarı yox. O vaxtdan hamı mənə Hacı deyir. Həmişə çalışıram ki, adımın qarşısındakı Hacı titulunu qoruya biləm. Elə bilirəm bu prinsipə riayət edə bilmişəm”.

İbadət edən siyasətçilərimiz


Xanım deputatlardan Qənirə Paşayevanın da namaz qılıb, ibadət etdiyi isə çoxlarına məlumdur.

İbadət edən siyasətçilərimiz


Milli Məclisin İctimai birliklər və dini qurumlar komitəsinin sədri, hakim Yeni Azərbaycan Partiyasının icra katibinin müavini Siyavuş Novruzov isə yalnız oruc tutarkən namaz qıldığını açıqlayıb. O qeyd edib ki, başqa vaxtlarda namaz qılmaq üçün vaxtı olmur: “İş çox olur. Namaz da elə bir məsələdir ki, gərək mütəmadi, ardıcıl ola. Bir gün oldu, iki gün olmadı, iki gün oldu, üç gün olmadı şəklində olmaz”. Siyavuş Novruzov onu da bildirib ki, hələ ki, Həcc ziyarətinə hazır deyil:

“İnsan gərək belə müqəddəs ziyarətə getmək üçün hazır olsun. Nə zaman hazır olsam, bunu özüm hiss edəcəyəm”.

İbadət edən siyasətçilərimiz


Eks-deputat Qalib Salahzadə isə ən çox Həcc ziyarətində olan parlament üzvü olub. O, 27 dəfə Həcc ziyarətində olub. Q. Salahzadə bununla da Azərbaycan tarixinə düşdüyünü qeyd edib: “Bunu bilirəm ki, Azərbaycan parlamentində bundan sonra 27 dəfə Həcdə, bir dəfə də Kəbə evinin içərisində olacaq deputat olmayacaq, necə ki, məndən başqası olmayıb”.

İbadət edən siyasətçilərimiz


Ümid Partiyasının sədri, eks-deputat İqbal Ağazadə də ibadət edən siyasətçilər sırasındadır. Belə ki, partiya sədrinin hələ deputat olarkən Türkiyənin Sultaniyyə məscidində namaz qılan zaman çəkilən fotosu yayılmışdı. Onun sözlərinə görə, artıq uzun illərdir ki, namaz qılır, ibadət edir.

İbadət edən siyasətçilərimiz


AXP sədri Pənah Hüseyn də ibadət əhlidir.

İbadət edən siyasətçilərimiz


AĞ Partiya sədri Tural Abbaslı da oruc tutub, namaz qılan siyasətçilərdən biridir. Partiya sədri müsahibələrinin birində qeyd edib ki, inanclı biri kimi İslamın bütün ayinlərini icra edir və bacardığı qədər buna sadiq qalmağa çalışır.

İbadət edən siyasətçilərimiz


Eləcə də ADP sədri Sərdar Cəlaloğlu namaz qılan siyasətçilərin siyahısındadır.

musavat.com






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
SOSİAL
DÜNYA